انجح طريقة لتحضير الجنواز pate génoise جربوها و اشكروني
وصفة الجينواز ❤️❤️ 6 بيض ،180 غ سكر ،180 غ فرينة ،ملعقة فانيلا ،الخميرة اختياري طريقة التحضير : نطلعو البيض مع السكر مليح (تحبو تفصلو البياض عن الصفار خاصة لي عندهم الباتور ضعيف ) المهم طلعوهم مليح لمدة 10 د ومن بعد تحبسو وتضيفو الفرينة مغربلة على 3 دفعات ،الخميرة كل فرن وكيفاه ،هي فالصح مكانش لخميرة ،مي انا الفرن نتاعي نحط لخميرة خير باش تجي ناعمة وكاين الفرن ولا الكوشة لوكان تحط الخميرة تجي حرشة فالذوق ولي يدير ذوق شكولا ،ينقص 30 غ فرينة ويدير في بلاصتها 30 غ كاكاو ،لكن بشرط الكاكاو نوعية جيدة كما بيمو ولا تهبط لكم الجينواز المول قطرو 25 سم تديرو ورق الزبدة وتحطو الخليط نتاعكم الفرن يكون مسخن من قبل على درجة حرارة من 160حتى 180 على حساب الفرن نتاعك كي تحطوها تطيب حطوها فالوسط تطيب من لتحت لمدة 20حتى 25 د على حساب الفرن ،ساع وتشعلو من لفوق تزيد طيب 5 د كي طيب خلوها فالفرن لمدة 5 د ويكون الباب مفتوح شوية ساع وخرجوها باش متهبطش ملاحظات: كي تعودو تخلطو فالفرينة ،خلطو في اتجاه واحد ،هاذي جينواز ماش بغرير تخرجولها روحها البيض يكون بحرارة الغرفة ❤️❤️ كي تحطو الخليط فالمول خبطو خبطة باش يخرج الهواء الجينواز ضروري تبات ليلة كاملة قبل ما تقطعوها